Es wor emool...

Ü90 - odder beinoh sou viel

Middwuchscaffe-Runde in unsrer Ånstald. „Es wor emool“
E Schoale Kaffee als Babbelwasser un es vezähle hod dodebai gråd sou gefludschd.
An dem Nochmiddaoch konnd mer in e Weld von anno dozumool neuschlubbe.
Wie hod mer sällemols ougebenneld: Do is geguggd worn, dass de Borsch gråd gewåchse wor un hauptsach er hod schaffe kenne un am beste e poor Ägger mitgebrochd. Dodemidd wors e gurri Baddie. Deen hod mer sich dann schnell geschnabbd. Die jung Fraa hod em dann was gekocht, un wenns em geschmeckt hod, dann is nimmer lang gefaggeld worn, do hods gebassd un mer hod bol geheierd.
Ebbes von de Werkdåchsschul:
Die Schulkinner hewwe in de erschde poor Klass mehr fern Lehrer doun misse, als dass se was gelernd hewwe. In seum Weubersch hewwe se ehm die Ärwedd mache misse un de Lehrer hod mim Fernglas von de Schul aus geguggd, ob ses a rischdisch mache, un fer em oannern Lehrer soi Fraa hewwe se es Schierholz un Doånnescheef vom Wald brenge misse. Erschd in de hehere Klasse, hewwe se es Oumoloans rischdisch gelernd. Do hod`s dann a Hefte gewe un nid nur Schieferdoafel un Griffel. Vor de Lehrer un vor de Geisdlische hod jeder Regatt gehoad, do hod`s sunsd Droachd Brischel gewe.
Verschmitzt hod sich oå besunne, dass se die kloåne Krumbirnschen in die Åere gedrähde hod, domid se die nid zamme lese mussd. Noch heid fraad se sich driwwer, dass se scho frieer sou ausgefuchsde wor. Sie hod åm Dåach 25 Lider Milch von 3 Kieh mit de Henn gemolge. Do is se noch heid stolz druff un aald sich in ihrer eischenen Lewensgeschichte, die a viel Viescherei un Krenk gehoäd hod.
Me hod gemohnd, grod isses bassierd, was do vezähld worn is. Maläsde konnd mer nid merke, koaner hod gegrääzd. Es hod scheunbar Allene behaachd un sie hewwe sich noch emol an dem Nochmiddoach jung gefield. Schnell wors widder zairisch zum hoåm gäin. Wischdisch: Boal is es widder sou weid: des derf de nid verhobbasse, am 15.Ogdower, widder emool in unserer Anstald.
Babbeld`s im Ord briehwoarm weider un frochd: „Du gäisd doch a dohi, gäll“?